不知不覺新學年已經過了個多月，
量量轉到新學校上K1,
Kiu Bee升上二年級，不再是全校最細個的學弟!
本來諗住過了個多月的放任暑期生活，新學年一定會好吾習慣，
想起KB每天的功課，和少不免的默書測驗，就慘!
點知原來媽媽的擔心是多餘的，
KB第一天上學已經在狀態了，做功課無吾開心，默書溫習都可以應付，
也沒有因為少了時間玩而發脾氣!
而且好似仲開心過一年級時，也很快認識了新朋友，
雖然都只係得一兩個，但咁快可以同人有傾有講，
對怕羞吾主動的KB來說已經係好難得!
新學年，KB成了四眼仔,也算很快習慣了,
睇嘢吾再朦查查，睇黑板吾駛走出位，人都醒目啲啦!
最緊要係寫手冊吾會吾知寫嘜喇!
一年級時,KB的豬肉岡位是功課長,專門幫手搬功課,
今年KB的新岡位是常識科科長,似乎升職了,起碼吾係只係做咕喱!
而媽媽最開心的是二年級的功課也沒有加重了很多,
除了頭一個星期,一來老師用了導修堂做班務和KB未收拾晒心情做得慢一啲外,
之後都做得好快,仲可以自己一個在房間做,
喺無姐姐幫手嘅現在真係幫輕媽媽不少,仲有就係KB啲字寫得靚咗好多!
暫時每天做完功課再練埋琴,一般六點前完成,咁都仲有啲時間玩下,
所以開學之後,KB都吾想睇電視,寧願玩,咁仲合媽媽心意
,希望之後都可以跟到呢個時間表,keep住吾好太多功課啦!
至於量量,佢已經好適應學校嘅生活,初頭兩星期,量量有時會喺課室喊少少,
都係因為有小朋友蝦,想玩耐啲玩具又無得玩,吾想搭保母車咁,
好自然,每日放學,媽媽第一句就係問:"今日開吾開心呀?有無喊?"
如果無喊就會讚又會俾啲小禮物,
於是量量每日放學第一時間就自動報告,有喊無喊都會自己申報,好老實!
好喇,到無再喊之後,量量報告另一樣嘢,其實之前都有日日報告架喇,
事源,開學頭一個星期,為咗令小朋友開心,放學時老師都會俾些小零食,
為食的量量每次都眉開眼笑,不過甜頭過後,老師吾會日日都俾零食,
於是量量放學後就好失望咁話:今日無禮物!
如事者,到今時今日量量每日放學都仲會第一時間報告,
但係咁緊張呢樣嘢嘅量量有一次就俾保母車上坐隔離個姐姐仔用一句
"你可吾可以俾粒糖我?"就"呃"咗粒糖!
那次量量報告俾媽媽知的時候,嗰樣好無奈,不過開場白都是一樣的:
量量 : 媽咪,今日老師有俾禮物!
媽媽(見佢兩手空空,個樣又奇奇怪咁) : 你食咗喇?
量量: 吾係!
媽媽 : 收埋咗喺書包?
量量: 吾係!
媽媽 : 跌咗?
量量 : 吾係!
媽媽 : 咁喺邊?
量量 : 我俾咗個姐姐!
好明顯,量量係好吾捨得的,只係吾熟人哋,吾知點拒絕人,於是就咁奉獻咗心愛嘅糖果!
希望量量自始學會保護自己啦!
除咗喜歡禮物外,K1另一樣量量好喜歡的是做功課!
K1的功課都只係油下顏色,劃下線,一分鐘就做完,每日慢一秒做都吾肯,
最驚喜是量量可以明白又記得老師講啲功課點做,會講番俾媽媽知,
老師講要注意嘅事項都會講番,真係大個仔!
而K1另一最大的不同是量量會講好多學校發生嘅事,
於是媽媽都好了解每日量量學到嘜嘢,食咗嘜嘢茶點,呢樣真係好令媽媽開心!
不過有一樣嘢量量到宜家都未習慣,就係入學校要用消毒搓手液,
一向吾鍾意對手仔黏黏嘅量量,平時食雞翼都你咁要抹手,宜家學校用的搓手液是比較稠嗰隻,結果量量每日都一直搓一直搓,搓到入房屋,
最好笑係途中佢要用手去嘟咭,又要俾手仔老師檢查,仲要用外銷老師give me five,所以對手仔好忙,嘟完又搓,搓完又檢查,查完又搓,搓完又give me five, give me five完又搓過!
但總括來說都係好適應亦都好開心!
做媽媽嘅我,見到兩兄弟有開開心心的校園生活,就放心又滿足了!
